و عـجـــــــــــــــــــــــــــــــــــــــــــــــــــــــــــــــــبى !!
مع ان كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقي ناس أشرار وناس طيبين
!!عجبي
عجبي عليك .. عجبي عليك يا زمن
يا بو البدع يا مبكي عيني دما
ازاي أنا أختار لروحي طريق
وأنا اللي داخل في الدنيا مرغما
!!عجبي
مرغم عليك يا صبح مغصوب يا ليل
لا دخلتها برجليا ولا كانلي ميل
شايلني شيل دخلت أنا في الحياة
وبكرة ح أخرج منها شايلني شيل
عجبي !!
سنوات وفايته عليا فوج بعد فوج
واحدة خدتني ابن والتانيه زوج
والتالتة أب خدتني والرابعة ايه
ايه يعمل اللي بيحدفه موج لموج ؟
عجبي !!
وأنا في الضلام .. من غير شعاع يهتكه
أقف مكاني بخوف ولا أتركه
ولما ييجي النور وأشوف الدروب
أحتار زيادة . . أيهم أسلكه ؟
عجبي !!
نظرت في الملكوت كتير وانشغلت
وبكل كلمه (ليه ؟) و(عشانيه) سألت
اسأل سؤال . . الرد يرجع سؤال
واخرج وحيرتي أشد مما دخلت
عجبي !!
خرج ابن آدم م العدم قلت : ياه
رجع ابن آدم للعدم قلت : ياه
تراب بيحيا .. وحي بيصير تراب
الأصل هو الموت والا الحياة ؟
عجبي!!
ضريح رخام فيه السعيد اندفن
وحفره فيها شريد من غير كفن
مريت عليهم . . قلت يا للعجب
الاتنين ريحتهم فيها نفس العفن
عجبي !!
ياما صادفت صحاب وما صحبتهمش
وكاسات خمور وشراب وما شربتهمش
أندم علي الفرص اللي أنا سبتهم
والا علي الفرص اللي ما سبتهمش
عجبي !!
غدر الزمان يا قلبي مالهوش أمان
وحاييجي يوم تحتاج لحبة ايمان
قلبي ارتجف وسألني .. أأمن بايه ؟
أأمن بايه ؟ محتار بقالي زمان
عجبي !!
يا باب أيا مقفول . . امتي الدخول
صبرت ياما واللي يصبر ينول
دقيت سنين . . والرد يرجع لي : مين ؟
لو كنت عارف مين أنا . . كنت أقول
عجبي !!
أنا شاب لكن عمري ولا ألف عام
وحيد ولكن بين ضلوعي زحام
خايف ولكن خوفي مني : أنا
أخرس ولكن قلبي مليان كلام
عجبي !!
أحب أعيش و لو أعيش في الغابات
أصحي كما ولدتني أمي وأبات
طائر .. حوان .. حشرة .. بشر .. بس أعيش
محلا الحياة . . حتي في هيئه نبات
عجبى !!
سهير ليالي وياما لفيت وطفت
وف ليله راجع في الضلام قمت شفت
الخوف .. كأنه كلب سد الطريق
وكنت عاوز أقتله .. بس خفت
عجبي !!
عجبتني كلمه من كلام الورق
النور شرق من بين حروفها وبرق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!
رقبة قزازة وقلبي فيها انحشر
شربت كاس واتنين وخامس عشر
صاحبت ناس م الخمر ترجع وحوش
وصاحبت ناس م الخمر ترجع بشر
عجبي !!
كل اللي في الخمارة صابهم جنون
صبحوا الرجال يتبادلوا كاس المنون
وبدم ونبيت انكتب ع الجدار
( ياميت ندامه ع اللي قلبه حنون )
عجبي !!
قالوا الشقيق بيمص دم الشقيق
والناس ماهياش ناس بحق وحقيق
قلبي رميته وجبت غيرة حجر
داب الحجر .... ورجعت قلبي رقيق
عجبي !!
يوم قلت آه . . سمعوني قالوا فسد
ده كان جدع قلبه حديد و اتحسد
رديت علي اللايمين انا وقلت . . آه
لو تعرفوا معني زئير الأسد
عجبي !!
Subscribe to:
Post Comments (Atom)
No comments:
Post a Comment